O‘zbekiston futbol assotsiatsiyasining matbuot xizmati rahbari hamda mashhur futbol sharhlovchisi Davron Fayziyev «90minut» podkastida «Manchester Siti» klubi va milliy terma jamoamiz himoyachisi Abduqodir Husanov bilan bog‘liq qiziqarli voqeani aytib o‘tdi.
Podkastdagi suhbat davomida Fayziyev Chempionlar ligasi pley-off bosqichida «Real Madrid»ga qarshi kechgan javob bahsida Abduqodirning qaysi futbolchi bilan o‘zaro kurashish eng qiyin bo‘lgani haqidagi taassurotlari bilan o‘rtoqlashdi.
Jurnalist o‘zbekistonlik himoyachiga savol bergan: «Madrid klubida Vinisius Junior, Kilian Mbappe hamda Jud Bellingem kabi yulduzlarga qarshi maydonga tushding. Ular orasida eng ko‘p qiyinchilik tug‘dirgan futbolchi kim bo‘ldi?».
Husanov o‘yin paytida bir necha bor yuzma-yuz kelganiga qaramasdan, na Mbappeni va na Vinisiusni tilga oldi. Uning javobi Fayziyevni biroz hayratga soldi:
«Haqiqatan, uchalasi ham kuchli futbolchilar, ammo ular ichida eng qiyini Jud Bellingemga qarshi o‘ynash bo‘ldi. Chunki Bellingem jismoniy tomondan juda baquvvat, u bilan kurashish va uni to‘xtatish juda katta kuch talab qildi», – deb javob bergan Abduqodir.
Eslatib o‘tamiz, Abduqodir Husanov qishki transfer oynasida Fransiyaning «Lans» klubidan Angliya chempioni «Manchester Siti» safiga qo‘shilgan edi. O‘zbekistonlik futbolchi «shaharliklar» tarkibida hozirgacha barcha turnirlar doirasida 9 ta o‘yin o‘tkazib, o‘z hisobini bitta gol bilan boyitishga erishgan. Husanov o‘zining kuchli o‘yinlari bilan tezda «Siti» muxlislari e’tiboriga tushdi va murabbiylar ishonchini qozondi.
Futbolchi yaqin yillarda o‘z pozitsiyasida jahon darajasidagi yulduzlardan biriga aylanishi taxmin qilinmoqda.
